Lənkəran Ağır Cinayətlər Məhkəməsində həmkəndlisini xüsusi amansızlıqla qətlə yetirməkdə təqsirləndirilən Əli Əliyevin cinayət işi üzrə məhkəmə prosesi yekunlaşıb.

Realmedia.info xəbər verir ki, məhkəmənin hökmü ilə Əli Əliyev 19 il müddətinə azadlıqdan məhrum edilib.

İttihama görə, hadisə Sabirabad rayonunun Moranlı kəndində baş verib. Kənd sakini Əli Əliyev həmkəndlisi Rüstəm Əliyevlə Şirvan şəhərində yerləşən şadlıq saraylarından birində keçirilən məclisdə spirtli içki qəbul etdikdən sonra aralarında mübahisə yaranıb. Mübahisə zamanı Rüstəm Əliyevin onu təhqir etdiyi və vurduğu bildirilir.

Hadisədən sonra Əli Əliyev qisas almaq məqsədilə Rüstəm Əliyevi öldürmək qərarına gəlib. O, həmkəndlisinin yaşadığı məhəlləyə gələrək onu evdən çağırıb. Rüstəm Əliyev küçəyə çıxdıqdan sonra Əli Əliyev özü ilə gətirdiyi bıçaqla ona hücum edib.

İstintaq materiallarına əsasən, təqsirləndirilən şəxs zərərçəkənə çoxsaylı bıçaq zərbələri endirərək onu xüsusi amansızlıqla qətlə yetirib. Daha sonra hadisə yerindən uzaqlaşmayaraq polisə təslim olub.

Məlumata görə, Əli Əliyev hadisədən əvvəl də məhkumluq həyatı yaşayıb və cəzaçəkmə müəssisəsindən az müddət əvvəl azadlığa buraxılıb.

Məhkəmə araşdırmaları nəticəsində onun təqsiri sübuta yetirilib və barəsində 19 il müddətinə azadlıqdan məhrumetmə cəzası təyin edilib.