Bakının Sabunçu rayonunun Maştağa qəsəbəsində gəlinini qətlə yetirməkdə təqsirləndirilən Ağanəbi Əliyev barədə məhkəmə hökmü elan edilib.

Realmedia.info xəbər verir ki, Bakı Ağır Cinayətlər Məhkəməsi-ndə hakim Vüqar Seyidov-un sədrliyi ilə keçirilən iclasda cinayət işi üzrə yekun qərar çıxarılıb.

Prokuror çıxışı zamanı təqsirləndirilənin 10 il 6 ay müddətinə azadlıqdan məhrum edilməsini təklif etsə də, məhkəmə qərarı ilə Ağanəbi Əliyev 9 il müddətinə azadlıqdan məhrum edilib.

İttihama görə, 66 yaşlı Ağanəbi Əliyev ailədaxili mübahisə zəminində 33 yaşlı gəlini Dürdanə Əliyevanı bıçaqlayaraq qətlə yetirib. Məlumata əsasən, mübahisə zamanı qadının qayınatasını təhqir etməsi hadisəyə səbəb olub.

Təqsirləndirilən şəxs məhkəmədə verdiyi ifadəsində də bu səbəbdən cinayəti törətdiyini etiraf edib. Faktla bağlı ona Azərbaycan Respublikası Cinayət Məcəlləsinin 120.1-ci (qəsdən adam öldürmə) maddəsi ilə ittiham irəli sürülüb.
Qeyd edək ki, qətlə yetirilən qadının üç azyaşlı övladı qalıb.