Gədəbəy rayonunun Slavyanka kəndində oğlunu öldürməkdə təqsirləndirilən ata barəsində məhkəmə araşdırması başa çatıb.

“Realmedia.info”nun məlumatına görə, məhkəmə istintaqı zamanı 60 yaşlı İlqar İlyasovun 37 yaşlı oğlu Rəşadı qətlə yetirməsi sübuta yetirilib.

Hadisə təxminən 4 ay əvvəl baş verib. İttihama əsasən, sərxoş vəziyyətdə olan Rəşad atasına işlədiyi halda qazanc əldə etməməsi ilə bağlı irad bildirib. Mübahisə zamanı oğlunun dediklərinə dözməyən ata onu bıçaqlayaraq öldürüb.

Məhkəmə prosesində mərhumun anası hüquqi varis kimi çıxış edib. O, ərini bağışladığını, onunla barışdığını və heç bir şikayətinin olmadığını bildirib. Ananın sözlərinə görə, Rəşad atasına dəstək olmaq üçün Bakını tərk edərək kəndə qayıdıb. O, həmçinin qeyd edib ki, hadisə qəsdən törədilməyib, ata ilə oğul bir-birini çox sevib.

Məhkəmənin hökmü ilə İlqar İlyasov 9 il müddətinə azadlıqdan məhrum edilib.