Tədbir Azərbaycan Respublikasının Dövlət Himninin səsləndirilməsi ilə başlayıb. Ardınca Ümummilli Lider Heydər Əliyevin, Xocalı soyqırımı qurbanlarının və respublikamızın müstəqilliyi, ərazi bütövlüyü uğrunda canından keçmiş şəhidlərin xatirəsi bir dəqiqəlik sükutla yad edilib.
Konfransı açıq elan edən Təşkilatın sədri, polkovnik Cəlil Xəlilov Xocalı soyqırımının ağır nəticələrindən danışıb. O bildirib ki, 1992-ci il fevralın 25-dən 26-na keçən gecə Ermənistan silahlı qüvvələri keçmiş SSRİ-yə məxsus 366-cı motoatıcı alayın iştirakı ilə Xocalı şəhərinə hücum edib, şəhər tam mühasirəyə alınıb və dinc əhaliyə qarşı xüsusi qəddarlıqla kütləvi qətliam törədilib.
Rəsmi məlumatlara əsasən, 613 nəfər qətlə yetirilib. Onlardan 63-ü uşaq, 106-sı qadın, 70-i isə qoca olub. 8 ailə tamamilə məhv edilib, 25 uşaq hər iki valideynini, 130 uşaq isə valideynlərindən birini itirib. 487 nəfər yaralanıb, 1275 nəfər əsir götürülüb, 150 nəfərin, o cümlədən 68 qadın və 26 uşağın taleyi bu günədək naməlum qalır.
Cəlil Xəlilov qeyd edib ki, Xocalı faciəsinə ilk dəfə hüquqi-siyasi qiymət 1994-cü ildə Heydər Əliyevin təşəbbüsü ilə verilib və Azərbaycan Respublikasının Milli Məclisi tərəfindən xüsusi qərar qəbul olunub. Bu qərar faciənin beynəlxalq ictimaiyyətə çatdırılması istiqamətində mühüm addım olub.
Bildirilib ki, Heydər Əliyev Fondunun təşəbbüsü və Fondun vitse-prezidenti Leyla Əliyevanın rəhbərliyi ilə həyata keçirilən “Xocalıya ədalət!” beynəlxalq kampaniyası nəticəsində faciə bir sıra ölkələrin parlamentləri və beynəlxalq təşkilatları tərəfindən tanınıb və siyasi qiymətini alıb.
Qeyd olunub ki, 2020-ci ildə Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində tarixi Qələbə qazanılıb, ölkəmizin ərazi bütövlüyü bərpa edilib və bununla da Xocalı qurbanlarının qanı yerdə qalmayıb.
Daha sonra “Biz soyqırıma və terrora yox deyirik!” adlı sənədli film nümayiş olunub.
Tədbirdə çıxış edən “Xocalı Soyqırımını Tanıtma” İctimai Birliyinin sədri, jurnalist Şamil Sabiroğlu Xocalı sakinlərinin üzləşdiyi soyqırımın dəhşətlərindən söz açıb, tarixi həqiqətlərin öyrənilməsinin və gələcək nəsillərə çatdırılmasının vacibliyini vurğulayıb.
Azərbaycan Ədəbiyyat Fondunun baş direktoru, Ümumdünya Yazıçılar Təşkilatının (WOW) katibi, “Ədəbiyyat və İncəsənət” portalının baş redaktoru, Əməkdar jurnalist Varis Yolçuyev çıxışında xalqımızın yaşadığı faciələrin və qəhrəmanlıqların təbliğində ədəbiyyat və mədəniyyətin mühüm rol oynadığını bildirib.
Bəhruz Sultanov adına 34 nömrəli tam orta məktəbin direktoru Nəcibə Axundova gənclərin milli tarixə dərindən bələd olmasının əhəmiyyətini qeyd edib.
Soyqırım şahidi Hüseynağa Quliyev yaşadığı hadisələrdən danışaraq, bu həqiqətlərin dünya ictimaiyyətinə çatdırılmasının vacibliyini bildirib.
Ehtiyatda olan mayor, Birinci Qarabağ və 44 günlük Vətən müharibəsinin iştirakçısı qazi Muxtar Həşimov çıxışında Xocalıda qətlə yetirilənlərin sayının yenidən dəqiqləşdirilməsinin vacibliyini vurğulayıb.
Tədbirdə “Xocalı Soyqırımını Tanıtma” İctimai Birliyinin İdarə Heyətinin üzvü Əziz İsmayılov, birliyin mətbuat katibi, eyni zamanda 44gunsavash.az saytının baş redaktoru Mövsümağa Abasov, eləcə də birliyin üzvləri Səma Seyidova və Aynurə Adgözəlova iştirak ediblər.
Mənbə: RealMedia.info
Müəllif: “Xocalı Soyqırımını Tanıtma” İctimai Birliyinin İdarə Heyətinin üzvü Əziz İsmayılov.