Astarada anasını qətlə yetirməkdə təqsirləndirilən Murad Kazımzadənin cinayət işi üzrə məhkəmə araşdırması başa çatıb.

Realmedia.info xəbər verir ki, hakim Ənnağı Məmmədlinin sədrliyi ilə keçirilən məhkəmə prosesində hökm elan olunub.

İttihama görə, hadisə 2025-ci il avqustun 22-də Astara rayonu ərazisində baş verib. Ailə üzvləri günorta yeməyinə hazırlaşarkən Murad Kazımzadə ilə anası Məhəbbət Qasımova arasında mübahisə yaranıb. Mübahisə zamanı təqsirləndirilən şəxs mətbəxdə olan bıçaqla anasına çoxsaylı zərbələr endirərək onu qətlə yetirib.

Məhkəmə materiallarına əsasən, hadisə baş verən zaman qadının valideynləri də evdə olub və baş verənlərin şahidi olublar. Hadisədən sonra Murad Kazımzadə ərazidən uzaqlaşaraq gizlənməyə çalışsa da, qısa müddət sonra polis əməkdaşları tərəfindən saxlanılıb.

Məhkəmə iclasında təqsirləndirilən şəxs ona verilmiş ittiham üzrə özünü təqsirli bilib. İbtidai istintaq zamanı verdiyi ifadələrdə anası ilə münasibətlərinin uzun müddətdir gərgin olduğunu, hadisə günü yaşanan mübahisədən sonra əsəbiləşərək cinayəti törətdiyini bildirib.

Araşdırma zamanı onun hadisədən əvvəl narkotik vasitədən istifadə etdiyini dediyi, həmçinin törətdiyi əmələ görə peşman olmadığını bildirdiyi də məlum olub.

Məhkəmənin hökmünə əsasən, Murad Kazımzadəyə qarşı irəli sürülmüş ittihamlardan biri xaric edilib və o, 15 il 6 ay müddətinə azadlıqdan məhrum edilib.