Bakıda yol hərəkəti zamanı yaranan mübahisə məhkəmə araşdırması ilə nəticələnib.

Realmedia.info xəbər verir ki, Nizami Rayon Məhkəməsində xuliqanlıqda təqsirləndirilən M.Səfərəliyevin cinayət işi üzrə məhkəmə istintaqı yekunlaşıb.

Hakim İlham Kərimlinin sədrliyi ilə keçirilən prosesdə hökm elan olunub. Məhkəmənin qərarına əsasən, M.Səfərəliyev 6 ay müddətinə azadlığın məhdudlaşdırılması cəzasına məhkum edilib.

Məlumata görə, hadisə 2026-cı il fevralın 18-də Nizami rayonu ərazisində baş verib. M.Səfərəliyev idarə etdiyi “Ford Transit” markalı avtomobillə hərəkətdə olarkən digər sürücü O.Əliyevin idarə etdiyi “Toyota Prius”un ona yol vermədiyini iddia edərək mübahisə yaradıb.

İstintaqla müəyyən olunub ki, tərəflər arasında yaranan mübahisə zamanı M.Səfərəliyev avtomobildən düşərək qarşı tərəfə yaxınlaşıb və ictimai yerdə ona yumruq zərbəsi endirib. Nəticədə zərərçəkmiş şəxs sağlamlığın qısa müddətə pozulmasına səbəb olan yüngül bədən xəsarəti alıb.

Cinayət işinin materiallarına əsasən, hadisə yaşayış binasının qarşısında baş verdiyindən ətraf sakinlərin narahatlığına səbəb olub. Təqsirləndirilən şəxsin hərəkətləri ictimai qaydanın kobud şəkildə pozulması və cəmiyyətə açıq hörmətsizlik kimi qiymətləndirilib.

Məhkəmə təqdim olunan sübutları araşdıraraq M.Səfərəliyevin təqsirli olması qənaətinə gəlib və barəsində azadlığın məhdudlaşdırılması cəzası təyin edib.