Hacıqabul rayonunda 16 yaşlı qızla erkən evlilik təşkil etməkdə təqsirləndirilən şəxsə hökm verilib.

Hadisə rayonun Meyniman kəndində qeydə alınıb. İttihama görə, 49 yaşlı Elsevər Həmidov (ad və soyad şərtidir) 23 yaşlı oğlu ilə 16 yaşlı qız üçün yaşadığı evin həyətində toy məclisi təşkil edib. Daxil olan məlumat əsasında polis əməkdaşları məclisə müdaxilə edərək toyun keçirilməsinin qarşısını alıblar.

Bundan sonra Elsevər Həmidov polis şöbəsinə aparılıb və onun barəsində Cinayət Məcəlləsinin 176-2-ci maddəsi ilə – on altı yaşına çatmayan şəxsin erkən evliliyinin təşkili ittihamı ilə cinayət işi başlanılıb.

Təqsirləndirilən şəxs məhkəmədə verdiyi ifadəsində bildirib ki, oğlu üçün qız axtararkən Sabirabad rayonunda yaşayan Günay adlı qız barədə müsbət fikirlər eşidiblər və bir neçə dəfə elçiliyə gediblər. Onun sözlərinə görə, qızın 16 yaşında olduğunu sonradan, sənədlər tələb olunarkən öyrəniblər.

Elsevər Həmidov qeyd edib ki, toy məclisinin keçirilməsində məqsəd yalnız ailəvi mərasim təşkil etmək olub. O bildirib ki, gəlin toyda iştirak etməyib və qızın 18 yaşı tamam olduqdan sonra ailəyə gətirilməsi planlaşdırılıb.

Məhkəmədə zərərçəkmiş qız təqsirləndirilən şəxsə qarşı şikayətinin olmadığını deyib.

Məhkəmənin qərarı ilə Elsevər Həmidov 1 il müddətinə azadlığın məhdudlaşdırılması cəzasına məhkum olunub. Ona elektron nəzarət qolbağı taxılıb, bir il müddətində Hacıqabul rayonunu tərk etməmək və gecə saat 23:00-dan səhər saat 07:00-dək yaşayış yerini tərk etməmək öhdəliyi qoyulub.