Ucar rayonunda yetkinlik yaşına çatmayan şəxsin uşaq dünyaya gətirməsi ilə bağlı yayılan məlumat əsasında aidiyyəti qurumlar tərəfindən araşdırmalara başlanılıb.

Bu barədə Ailə, Qadın və Uşaq Problemləri üzrə Dövlət Komitəsinin mətbuat katibi Teymur Mərdanoğlu Oxu.Az-a açıqlamasında bildirib.

Onun sözlərinə görə, sosial şəbəkələrdə yayılan məlumatlarla bağlı dərhal müvafiq qurumlar hərəkətə keçib:

“Yerli icra hakimiyyəti orqanının təqdim etdiyi məlumata əsasən, yetkinlik yaşına çatmayan şəxs və yeni doğulmuş körpə hazırda tibb müəssisəsindədir, onların vəziyyəti qənaətbəxş olaraq qiymətləndirilir. Faktla bağlı aidiyyəti qurumlar tərəfindən araşdırma davam etdirilir və nəticələrdən asılı olaraq hüquqi qiymət veriləcək. Eyni zamanda ana və körpənin hüquqlarının qorunması, onların sosial və psixoloji dəstəklə təmin olunması istiqamətində zəruri tədbirlər görülür”, – deyə T.Mərdanoğlu qeyd edib.

Daxili İşlər Nazirliyinin Mətbuat Xidmətinin regional qrupundan verilən məlumata görə, faktla bağlı Ucar Rayon Polis Şöbəsində cinayət işi başlanılıb və istintaq aparılır.

Məlumata əsasən, 15 yaşlı yeniyetmə Ucar Rayon Mərkəzi Xəstəxanasının Doğum şöbəsinə yerləşdirilib və aprelin 14-də uşaq dünyaya gətirib. Həkimlərin bildirdiyinə görə, ana və körpənin vəziyyəti nəzarət altında olub və sonradan onların vəziyyəti stabil qiymətləndirilib.

Hadisə ilə bağlı araşdırmalar davam etdirilir. Nəticələrdən asılı olaraq hüquqi tədbirlərin görüləcəyi bildirilir.