21 fevral dünyada Beynəlxalq Ana Dili Günü kimi qeyd olunur. Bu gün 1999-cu ilin noyabrında Banqladeşin təşəbbüsü ilə UNESCO tərəfindən təsis edilib.

Beynəlxalq Ana Dili Günü 1952-ci il fevralın 21-də Banqladeşdə ana dilinin rəsmi status alması uğrunda keçirilən etirazlar zamanı 4 tələbənin həlak olması hadisəsinin xatirəsinə həsr olunub. Bu tarix dil müxtəlifliyinin qorunmasının və ana dilinə hörmətin vacibliyini bütün dünyaya xatırladır.

Dil hər bir xalqın milli kimliyini, mədəni irsini və mənəvi dəyərlərini yaşadan əsas amildir. Ana dili insanın təfəkkürünün formalaşmasında, dünyagörüşünün genişlənməsində, təhsilində və cəmiyyətlə ünsiyyətində mühüm rol oynayır.

Azərbaycanda dövlət dilinin qorunması və inkişafı daim diqqət mərkəzində saxlanılıb. Ümummilli lider Heydər Əliyevin rəhbərliyi ilə bu sahədə mühüm hüquqi baza formalaşdırılıb. 2002-ci il sentyabrın 30-da qəbul edilən “Azərbaycan Respublikasında dövlət dili haqqında” Qanun Azərbaycan dilinin tətbiqi və inkişafı istiqamətində mühüm addım olub.

Hazırda bu siyasət Prezident İlham Əliyev tərəfindən uğurla davam etdirilir. Ana dilimizin qorunması və zənginləşdirilməsi istiqamətində həyata keçirilən tədbirlər milli-mənəvi dəyərlərimizin möhkəmlənməsinə xidmət edir.
Ana dilini qorumaq və inkişaf etdirmək hər bir azərbaycanlının mənəvi borcudur.