Xəbər verdiyimiz kimi, Ucar rayonunda 15 yaşlı qızın uşaq dünyaya gətirməsi ilə bağlı məlumat yayılıb.

Realmedia.info xəbər verir ki, hadisə ilə bağlı azyaşlının anası açıqlama verib. O bildirib ki, baş verənlərdən xəbəri olmayıb və məsələ həkim müayinəsi zamanı üzə çıxıb.

“Martın 31-də qızımı həkimə apardım, orada bildim ki, hamilədir. Qız deyir ki, qonşumuz ona qarşı zorakılıq edib. Həmin şəxslə gediş-gəlişimiz olub, yaxın münasibətimiz var idi”, – deyə ana qeyd edib.

İddialarda adı hallanan şəxsin atası isə oğlunun günahsız olduğunu bildirib. Onun sözlərinə görə, məsələ ilə bağlı bir neçə nəfər polisə çağırılaraq izahat verib və həqiqət DNT müayinəsinin nəticələrindən sonra məlum olacaq.

Məsələ ilə bağlı Ailə, Qadın və Uşaq Problemləri üzrə Dövlət Komitəsindən bildirilib ki, sosial şəbəkələrdə yayılan məlumat əsasında müvafiq araşdırmalara başlanılıb.

Hadisə ilə bağlı hüquq-mühafizə orqanları tərəfindən araşdırma davam etdirilir.