Bakı Nizami Rayon Məhkəməsində “Yeni Klinika”da əməliyyat zamanı xəstənin ölümü ilə bağlı cinayət işi üzrə məhkəmə prosesi başa çatıb.

Realmedia.info xəbər verir ki, hakim Emin Axundovin sədrliyi ilə keçirilən prosesdə həkim Sevinc Məmmədova 2 il 6 ay müddətinə azadlığın məhdudlaşdırılması cəzasına məhkum edilib və elektron qolbaq daşıyacaq.

Sevinc Məmmədova “Yeni Klinika” PHŞ-nin Reproduktiv Sağlamlıq və Ailə Planlaması Mərkəzində Ginekologiya şöbəsində işləyərkən icra etdiyi əməliyyat zamanı xəstə Günay Məmmədovanın ölümünə səbəb olmaqda təqsirli bilinib. Cinayət işi Bakı şəhəri Nizami rayon prokurorluğunda Cinayət Məcəlləsinin 314.2-ci maddəsi (səhlənkarlıq ağır nəticələrə səbəb olduqda) üzrə açılıb.

İstintaq və ekspertiza rəylərinə görə, Sevinc Məmmədova mayın 6-da icra etdiyi cərrahiyyə əməliyyatı zamanı texniki qüsur törədib və qanaxmanın mənbəyini aradan qaldırmaq üçün cərrahi müdaxiləni gecikdirib. Nəticədə mayın 18-də xəstə ölüb.

Məhkəmə qərarı ilə Sevinc Məmmədova azadlığın məhdudlaşdırılması cəzasına məhkum olunub, daha əvvəl tətbiq edilmiş polisin nəzarəti və vəzifədən kənarlaşdırılma qətimkan tədbirləri isə qüvvədə saxlanılıb.