Azərbaycanda kənd təsərrüfatının inkişafı, torpaq və su resurslarından səmərəli istifadə istiqamətində həyata keçirilən tədbirlər nəticəsində mühüm nəticələr əldə olunub.

Realmedia.info xəbər verir ki, bunu Prezidentin köməkçisi, Prezident Administrasiyasının Ərazi-təşkilat məsələləri şöbəsinin müdiri Zeynal Nağdəliyev “Azərbaycanda kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı” çərçivəsində Abşeron-Xızı və Quba-Xaçmaz iqtisadi rayonları üzrə keçirilən müşavirədə bildirib.

Zeynal Nağdəliyev qeyd edib ki, Prezident İlham Əliyevin tapşırıqlarına uyğun olaraq, ayrı-ayrı şəxslər tərəfindən mülkiyyətə alınmış və ya uzunmüddətli icarəyə götürülərək istifadəsiz saxlanılan 169,1 min hektar torpaq sahəsi yenidən əkin dövriyyəsinə cəlb edilib.

Bildirilib ki, aqrar sahədə aparılan islahatlar çərçivəsində su təminatının yaxşılaşdırılması, müasir suvarma sistemlərinin tətbiqi və kənd təsərrüfatı texnikası parkının yenilənməsi istiqamətində də genişmiqyaslı işlər görülür.

Hazırda ölkənin 32 rayonunda yaradılan 52 aqropark kənd təsərrüfatı məhsullarının istehsalının artırılmasına, idxaldan asılılığın azaldılmasına və regionlarda yeni məşğulluq imkanlarının yaranmasına mühüm töhfə verir.

Prezidentin köməkçisi vurğulayıb ki, torpaq və su ehtiyatlarından daha səmərəli istifadə, yeni Dövlət Proqramının əsas prioritet istiqamətlərindən biri olacaq.