“Vergi inzibatçılığının təkmilləşdirilməsi məqsədi ilə bir sıra normativ hüquqi aktların təsdiq edilməsi haqqında” qərarda dəyişiklik edilib.

Realmedia.info Oxu.az-a istinadən xəbər verir. Bildirilir ki, qərarı iqtisadiyyat naziri Mikayıl Cabbarov imzalayıb.
Dəyişikliyə əsasən, əlilliyi olan şəxslərin əl işlərinin satışından əldə etdikləri gəlirlərin vergiyə cəlb olunması qaydasına yenilik edilib.

Qərara görə, Əmək və Əhalinin Sosial Müdafiəsi Nazirliyi yanında fəaliyyət göstərən Dayanıqlı və Operativ Sosial Təminat Agentliyi (DOST) bu satışlardan əldə edilən gəlirlər üzrə ödəmə mənbəyində vergini tutacaq. Həmçinin, tutulan vergilər barədə rüb başa çatdıqdan sonra növbəti ayın 20-dən gec olmayaraq vergi orqanına bəyannamə təqdim ediləcək.

Sənədə əsasən, sözügedən satışlardan əldə edilən gəlirlərdən xərclər çıxılmadan 2 faiz dərəcə ilə ödəmə mənbəyində vergi tutulacaq. Bu halların araşdırılması üçün Avtomatlaşdırılmış Vergi İnformasiya Sistemindən kənar qaydada kameral vergi yoxlamaları aparılacaq.

Yoxlama zamanı əl işlərinin satışından əldə edilən gəlirlərlə bağlı vergitutma obyektinin düzgün müəyyən edilməsi ayrıca araşdırılacaq.

Mövcud qanunvericiliyə əsasən, əlilliyi olan şəxslər əl işlərini internet üzərindən satdıqları halda sosial vergi ödəmirlər. Yeni qaydalar isə vergi inzibatçılığının sadələşdirilməsi və onların özünüməşğulluq təşəbbüslərinin dəstəklənməsi məqsədi daşıyır.

Bundan əlavə, əl işlərinin satışı üçün xüsusi elektron portal da yaradılacaq və əlilliyi olan şəxslər həmin platformada qeydiyyatdan keçərək satış həyata keçirə biləcəklər.