Azərbaycanda yay fəsli başlayıb.

Realmedia.info xəbər verir ki, Bakı Dövlət Universitetinin (BDU) Fizika fakültəsinin Astrofizika kafedrasının məlumatına görə, yay fəsli (Yay günəş duruşu) iyunun 21-də Bakı vaxtı ilə saat 12:24:26-da başlayıb.

Bu zaman Şimal yarımkürəsində astronomik yay, Cənub yarımkürəsində isə qış fəsli başlayır. Yay günəş duruşu zamanı Günəş səmada ilin ən yüksək nöqtəsinə çatır.

Məlumata əsasən, bu gün Bakıda Günəş günorta vaxtı üfüqdən maksimum 73,1 dərəcə hündürlükdə olacaq.

Qeyd olunur ki, iyunun 21-i ilin ən uzun gündüzü və ən qısa gecəsinin müşahidə olunduğu gündür. Bu gün gündüzün uzunluğu 15 saat 03 dəqiqə 24 saniyə, gecənin uzunluğu isə 8 saat 56 dəqiqə 36 saniyə təşkil edəcək.

Astronomik yay fəslinin müddəti isə 93 gün 15 saat 40 dəqiqə 42 saniyə olacaq.