Gömrük orqanlarında sınağın keçirilməsi qaydası və şərtləri təsdiqlənib.

Realmedia.info xəbər verir ki, bununla bağlı müvafiq qərar imzalanıb.

Qərara əsasən, gömrük orqanlarında rəhbər vəzifələrə təyin olunan şəxslər, dövlət qulluqçuları və ya əvvəllər dövlət qulluğunda çalışmış, müvafiq ixtisas dərəcəsinə malik şəxslər, eləcə də elmi dərəcəsi olan şəxslər üçün sınaq müddəti müəyyən edilməyəcək. Həmin şəxslər birbaşa daimi xidmətə qəbul olunacaqlar.

Digər namizədlər üçün isə vəzifədən və hazırlıq səviyyəsindən asılı olaraq altı aya qədər sınaq müddəti tətbiq ediləcək. Bu müddət ərzində şəxslərə xüsusi rütbə verilməyəcək və onlar yalnız vəzifə maaşı alacaqlar.

Sınaq müddətinin nəticələri namizədə təyin edilən mentor və Dövlət Gömrük Komitəsinin Akademiyası tərəfindən qiymətləndiriləcək. Mentor tərəfindən verilən tapşırıqların icrası 2-dən 5-dək bal sistemi ilə dəyərləndiriləcək. Orta qiymət balı üç və daha yüksək olduqda nəticə məqbul hesab ediləcək.

Bundan əlavə, peşə bacarıqları, etik davranış qaydalarına və xidməti intizama riayət olunması da qiymətləndirmə zamanı nəzərə alınacaq.

Sınaq müddətinin nəticələri ilə razılaşmayan şəxslər həmin qərardan inzibati və ya məhkəmə qaydasında şikayət vermək hüququna malik olacaqlar.

Yeni qaydalar gömrük orqanlarında kadrların peşə hazırlığının və fəaliyyətinin daha səmərəli qiymətləndirilməsinə xidmət edəcək.