İyunun 16-da Bakı Apellyasiya Məhkəməsində Ermənistanın Azərbaycana qarşı hərbi təcavüzü nəticəsində törədilmiş çoxsaylı ağır cinayətlərə görə məhkum olunmuş Ermənistan Respublikası vətəndaşlarının apellyasiya şikayətləri üzrə məhkəmə baxışı davam etdirilib.

Məhkəmə iclası hakim Elmar Rəhimovun sədrliyi, Emin Mehdiyev və Mehriban Qarayevanın iştirakı ilə keçirilib. Təqsirləndirilən şəxslər erməni və rus dillərində tərcüməçilərlə, həmçinin müdafiəçilərlə təmin olunublar.

İclasda zərərçəkmiş şəxslərin nümayəndələri və dövlət ittihamını müdafiə edən prokurorlar da iştirak ediblər. Məhkəmədə bildirilib ki, əvvəlki iclasda müdafiə çıxışlarına hazırlaşmaq üçün vaxt verilib və müdafiə tərəfi çıxışlara hazır olduğunu bəyan edib.

Təqsirləndirilən Davit İşxanyanın müdafiəçisi ilə konfidensial görüş keçirməsi üçün verdiyi vəsatət təmin olunub. Fasilədən sonra məhkəmə iclası davam etdirilib.

Daha sonra Levon Mnatsakanyanın vəkili müdafiə çıxışı edərək, onun barəsində bəraət hökmünün çıxarılmasını xahiş edib. Ardınca L.Mnatsakanyan özü çıxış edərək vəkilinin mövqeyini dəstəklədiyini bildirib.

Məhkəmənin növbəti iclası iyunun 23-nə təyin olunub.

Qeyd edək ki, Bakı Hərbi Məhkəməsinin 5 fevral 2026-cı il tarixli hökmü ilə Arayik Arutyunyan, Levon Mnatsakanyan, David Manukyan, Davit İşxanyan və David Babayan ömürlük azadlıqdan məhrum ediliblər. Digər təqsirləndirilən şəxslər isə 15 ildən 20 ilədək müddətə azadlıqdan məhrumetmə cəzası alıblar.

Realmedia.info