Respublika Perinatal Mərkəzində yeddi körpənin həyatını itirdiyi yanğınla bağlı təqsirləndirilən şəxslərin cinayət işi üzrə növbəti məhkəmə prosesi keçirilib.

Realmedia.info xəbər verir ki, Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə keçirilən iclasda təqsirləndirilənlərin son söz mərhələsinə başlanılıb.

Proses zamanı mərkəzin sabiq direktoru Mehriban Abbasquliyeva məhkəmədən əlavə vaxt istəyib. Bununla əlaqədar məhkəmə iclasına bir neçə saatlıq fasilə verilib. Fasilədən sonra onun qan təzyiqinin qəfil yüksəldiyi və xəstəxanaya yerləşdirildiyi məlum olub.

Bu səbəbdən məhkəmə prosesi iyunun 4-dək təxirə salınıb.

Qeyd edək ki, 2024-cü il yanvarın 9-da Respublika Perinatal Mərkəzinin inzibati binasında baş vermiş yanğın nəticəsində yeddi yenidoğulmuş həyatını itirib, dörd nəfər xəsarət alıb. Hadisə nəticəsində müəssisəyə ümumilikdə 361 min manat məbləğində maddi ziyan dəyib.

İstintaq materiallarına əsasən, yanğının baş verməsinə müəssisənin elektrik təsərrüfatının həddindən artıq yüklənməsi, həmçinin yanğın təhlükəsizliyi sahəsində mövcud nöqsanların aradan qaldırılmaması səbəb olub.

Cinayət işi üzrə sabiq direktor Mehriban Abbasquliyeva vəzifə səlahiyyətlərindən sui-istifadə və yanğın təhlükəsizliyi qaydalarını pozma, şöbə müdirləri Hamlet Mustafayev və Elnur Əhmədli isə yanğın təhlükəsizliyi qaydalarını pozma maddələri ilə təqsirləndirilirlər.