Salyan rayonunda 84 baş xırdabuynuzlu heyvanla birlikdə yoxa çıxan 26 yaşlı çoban Ramiz Rüstəmovla bağlı yeni təfərrüatlar məlum olub.

Abatv.az xəbər verir ki, təsərrüfat sahibi İlkin Rüstəmovun İctimai TV-yə verdiyi məlumata görə, çoban heyvanları qonşunun oğlu ilə birlikdə Xırdalan şəhərində satıb.

"Qoyunlarımı satdığı yeri tapdım, getdim 72-ni alıb gəldim. Satdığı şəxs məndən pul istədi, dedim pulu kimə vermisənsə, get ondan al", – deyə təsərrüfat sahibi bildirib.

Onun sözlərinə görə, oğurlandığı iddia edilən heyvanların 72 başını geri qaytarmaq mümkün olub.

Ramiz Rüstəmovun yaxınları isə bildiriblər ki, bu, ilk belə hadisə deyil. Onların sözlərinə görə, o, əvvəllər də bir neçə dəfə eyni hərəkəti edib, bir müddət sonra isə evə qayıdıb. Lakin bu dəfə artıq 3-4 gündür ki, ondan heç bir xəbər yoxdur.

Əldə olunan digər məlumata görə, Ramiz Rüstəmov heyvanları özü aparıb. İtkin düşdüyü bildirilən sürüdə ümumilikdə 54 baş qoyun və 30 baş keçi olub. Aparılan araşdırmalar nəticəsində 71 baş heyvan tapılıb, 14 baş heyvanın isə Ramiz Rüstəmov tərəfindən aparıldığı müəyyən edilib.

Xatırladaq ki, hadisə Salyan rayonunun Qırxçıraq kəndi ərazisində baş verib. Hüquq-mühafizə orqanları Ramiz Rüstəmovun yerinin müəyyənləşdirilməsi istiqamətində axtarış və araşdırma tədbirlərini davam etdirirlər.