Yarım milyon manatdan çox dəyəri olan heyvanların mənimsənilməsi ilə bağlı səs-küylü cinayət işi üzrə ittiham olunan çobanların ailə üzvləri açıqlama verib. Onlar yayılan iddialarla razılaşmadıqlarını bildirərək, hadisədə ferma sahiblərini günahlandırıblar.
Realmedia xəbər verir ki, oğurluq hadisəsi Sumqayıt və Salyan rayonlarında yerləşən iki ayrı fermada baş verib. İttihama görə, çobanlar Kəmaləddin Hüseynov və Ceyhun Əskərov sahibkarlara məxsus ümumilikdə 1 377 baş xırdabuynuzlu heyvanı onların xəbəri olmadan sataraq əldə olunan pulu mənimsəyiblər. Zərərin ümumi məbləğinin yarım milyon manatdan çox olduğu bildirilir.
Lakin həbs edilən Kəmaləddin Hüseynovun bacısı və Ceyhun Əskərovun anası bu ittihamları əsassız adlandırıblar. Onların sözlərinə görə, heyvanların satışı ferma sahiblərinin razılığı və məlumatı daxilində həyata keçirilib və sonradan məsuliyyətdən yayınmaq üçün bütün günah çobanların üzərinə atılıb.
Ailə üzvləri iddia edirlər ki, istintaq zamanı bu məqamlar lazımi səviyyədə araşdırılmayıb və məsələyə birtərəfli yanaşma sərgilənib. Onlar hüquq-mühafizə orqanlarından işin yenidən və obyektiv şəkildə araşdırılmasını tələb edirlər.
Hazırda faktla bağlı cinayət işi davam edir, istintaq orqanları tərəfindən əlavə araşdırmalar aparılır.