Böyük Britaniya hökuməti regionda artan təhlükəsizlik riskləri fonunda İrandakı diplomatik heyətini müvəqqəti olaraq geri çağırıb.

Realmedia.info xəbər verir ki, bu barədə Böyük Britaniyanın Xarici İşlər Nazirliyi məlumat yayıb.

Rəsmi açıqlamada bildirilib ki, regiondakı gərginlik və təhlükəsizlik vəziyyəti ilə bağlı yenilənmiş qiymətləndirmələr nəzərə alınaraq diplomatik heyətin İrandan çıxarılması qərara alınıb. Bununla yanaşı, Böyük Britaniyanın Tehrandakı səfirliyinin fəaliyyətini məsafədən davam etdirəcəyi qeyd olunub.

Nazirlik öz vətəndaşlarını İrana səfər etməkdən çəkinməyə çağırıb. Həmçinin İranda olan Britaniya vətəndaşlarına ölkədə qalıb-qalmamaq məsələsini ciddi şəkildə dəyərləndirmələri tövsiyə edilib. Bildirilib ki, Britaniya pasportunun və ya Böyük Britaniya ilə əlaqələrin olması İran hakimiyyəti tərəfindən saxlanılma riski yarada bilər.

Qeyd edək ki, son günlər Yaxın Şərqdə təhlükəsizlik vəziyyətinin daha da gərginləşməsi beynəlxalq ictimaiyyətin narahatlığını artırıb. Xatırladaq ki, iyulun 22-də ABŞ Prezidenti Donald Tramp Hörmüz boğazında gəmilərə edilən hücumlara cavab olaraq İranı körpülərə və elektrik stansiyalarına zərbələr endirməklə hədələmişdi.