Aprelin 12-də Azərbaycanın İrandakı səfirliyi öz fəaliyyətini yenidən bərpa edib.

Realmedia.info xəbər verir ki, bu barədə Azərbaycan Xarici İşlər Nazirliyi məlumat yayıb.

Bildirilib ki, səfirlik ilkin mərhələdə səfir daxil olmaqla, məhdud sayda diplomatik və inzibati heyətlə fəaliyyət göstərəcək. Təhlükəsizlik və təşkilati məsələlər nəzərə alınaraq, səfirliyin işinin mərhələli şəkildə tənzimlənməsi planlaşdırılır.

Məlumatda qeyd olunub ki, səfirliyin fəaliyyətinin bərpası İranda hərbi əməliyyatların dayandırılması və ikihəftəlik atəşkəsin elan edilməsindən qısa müddət sonra baş tutub.

“Azərbaycan səfirliyinin İranda fəaliyyətini bərpa etməsi ölkəmizin qonşu və dost İranla münasibətlərə verdiyi xüsusi önəmin bariz nümunəsidir. Azərbaycan regionda davamlı sülh və sabitliyin təmin olunması istiqamətində irəli sürülən təşəbbüsləri dəstəklədiyini bir daha bəyan edir”, – deyə məlumatda vurğulanıb.