Xırdalan şəhərində qeydə alınan dələduzluq hadisəsi ilə bağlı 27 yaşlı Elvin Mehdiyev polis əməkdaşları tərəfindən saxlanılıb.
Məlumata görə, Elvin adlı şəxs yoldan keçən Nadir (şərti ad) adlı vətəndaşa yaxınlaşaraq maddi ehtiyacı olduğunu bildirərək ondan 1 manat pul istəyib. Nadir pulu verərkən, Elvin onun cibində xeyli miqdarda vəsait olduğunu görüb və “sosial eksperiment” apardıqlarını iddia edərək, çəkiliş bitdikdən sonra pulu geri qaytaracaqlarını deyib daha çox pul verməsini xahiş edib.
Qarşı tərəfin sözlərinə inanan Nadir cibindən daha çox pul çıxararaq Elvinə təqdim edib. Elvin isə 1350 manatı götürdükdən sonra hadisə yerindən uzaqlaşıb.
Daxil olan şikayət əsasında polis əməkdaşlarının keçirdiyi əməliyyat tədbirləri nəticəsində dələduzluq əməlini törətməkdə şübhəli bilinən 27 yaşlı Elvin Mehdiyev saxlanılıb.
Faktla bağlı araşdırma aparılır.