Bakı. – “Cəzaçəkmə müəssisələrində olan şəxslər də icbari tibbi sığortadan istifadə edə biləcək”.
Bunu İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev 2025-ci ilin yekunlarına həsr olunmuş mətbuat konfransında bildirib.

Zaur Əliyev açıqlamasında deyib ki, “Tibbi sığorta haqqında” qanuna edilən dəyişikliklər nəticəsində sığortaolunan şəxslərin əhatə dairəsi genişlənib: “Belə ki, həbs edilmiş və müəyyən müddətə və ya ömürlük azadlıqdan məhrumetmə cəzası çəkən şəxslər (məntəqə tipli cəzaçəkmə müəssisələrində cəza çəkənlər istisna olmaqla) də icbari tibbi sığorta hesabına tibbi xidmətlərdən faydalana biləcəklər”.

Sığorta çərçivəsində ədliyyə müəssisələrində zəruri avadanlıq və mütəxəssis olmadığı hallarda tibbi xidmətlərin təmin olunacağı bildirilib. Bu mexanizm sayəsində ildə təxminən 1500 nəfərin tibbi xidmətlərlə əhatə olunması planlaşdırılır. Bunun üçün 200 min manatadək vəsait ayrılıb.

Agentlik sədrinin sözlərinə görə, icbari tibbi sığorta həmçinin Azərbaycan vətəndaşları, qaçqın statusu almış şəxslər və BMT-nin Qaçqınlar üzrə Ali Komissarlığının himayəsində olan şəxslər üçün də təmin edilir.