BMT-nin Cenevrədəki mənzil-qərargahında Azərbaycanın BMT yanında Daimi Nümayəndəliyi, Caspisnet elmi şəbəkəsi və Tehran Konvensiyası Katibliyinin birgə təşkilatçılığı ilə "Xəzər dənizinin qorunması üçün ətraf mühitin idarə olunmasının və beynəlxalq əməkdaşlığın gücləndirilməsi" mövzusunda yüksək səviyyəli panel müzakirələri keçirilib.
Tədbirin rəsmi hissəsində çıxış edən Leyla Əliyeva Xəzər dənizinin qlobal əhəmiyyəti, ekoloji təhdidlər və gələcək nəsillər üçün qorunmasının vacibliyi barədə məlumat verib. O, dəniz səviyyəsinin azalması və biomüxtəlifliyin itirilməsi proseslərinin qarşısının vaxtında alınmasının əhəmiyyətini vurğulayaraq iştirakçıları konkret tədbirlər görməyə çağırıb.
BMT-nin Cenevrə ofisinin baş direktoru Tatyana Valovaya və Azərbaycanın BMT yanında daimi nümayəndəsi Qalib İsrafilov çıxışlarında belə müzakirələrin dövlət qurumları, beynəlxalq təşkilatlar və ekspert icması arasında dialoqun inkişafı üçün vacib olduğunu bildiriblər. Onlar ətraf mühitin idarə olunması sahəsində məlumat və təcrübə mübadiləsinin Xəzər dənizinin qorunmasına töhfə verəcəyini qeyd ediblər.
Panel sessiyalarda BMT-nin Ətraf Mühit Proqramının Avropa üzrə regional direktoru Arnold Kraylhuber, Ümumdünya Səhiyyə Təşkilatının Avropa Ətraf Mühit və Səhiyyə Mərkəzinin rəhbəri Françeska Raçioppi, eləcə də Cenevrə Universiteti, "Geneva Water Hub", Caspisnet və digər beynəlxalq təşkilat və beyin mərkəzlərinin nümayəndələri iştirak ediblər. Müzakirələrdə ətraf mühitin idarə olunması, elmi tədqiqatların əhəmiyyəti, beynəlxalq əməkdaşlıq və su diplomatiyasının rolu geniş müzakirə olunub, bir sıra təşəbbüslər irəli sürülüb.
İştirakçılar üçün Xəzər dənizinin ekoloji problemlərinə həsr olunmuş qısametrajlı sənədli film nümayiş etdirilib və tədbir interaktiv sual-cavab sessiyası ilə yekunlaşıb.