Bu gün, 27 yanvar 2026-cı il, Baş nazir Əli Əsədovun sədrliyi ilə Nazirlər Kabinetində Xəzər dənizi və Bakı buxtasının ekoloji vəziyyətinə dair iclas keçirilib.

İclasda Xəzər dənizində köhnəlmiş hidrotexniki qurğuların, quyuların, batmış və yarımbatmış gəmilərin çıxarılması və ekosistemin bərpası üçün 2025–2030-cu illəri əhatə edən Kompleks Tədbirlər Planının icrası müzakirə olunub. Dövlət orqanlarına monitorinqlərin aparılması, interaktiv xəritələrin hazırlanması və tədbirlərin dəniz ekosisteminə təsirinin qiymətləndirilməsi tapşırılıb.

Bakı buxtasında uzun müddət davam edən çirklənmənin qarşısının alınması üçün ətraf mühitin qorunması, tullantıların yığılması və neft çirklənməsinin aradan qaldırılması üzrə konkret tədbirlər planının hazırlanması qərara alınıb. İclasda həmçinin fövqəladə hallar, ekoloji və gəmiçilik sahələrinin məsul şəxsləri də çıxış edərək vəziyyətlə bağlı tövsiyələrini veriblər.