Azərbaycan Respublikasının xarici işlər naziri Ceyhun Bayramov Türk Dövlətləri Təşkilatının Baş katibi Kubanıçbek Ömüraliyev ilə görüş keçirib. Görüş zamanı İran tərəfindən Naxçıvan Muxtar Respublikasına qarşı həyata keçirilmiş dron hücumları və regionda yaranmış təhlükəsizlik vəziyyəti müzakirə olunub.

Məlumata görə, tərəflər baş verən hadisənin regional sabitlik üçün yaratdığı riskləri diqqətə çatdırıb və türk dövlətləri arasında əməkdaşlığın daha da gücləndirilməsinin vacibliyini vurğulayıblar. Görüşdə həmçinin mövcud təhlükəsizlik çağırışlarına qarşı birgə fəaliyyətin və koordinasiyanın artırılması məsələləri də gündəmdə olub.

Nazir Ceyhun Bayramov Naxçıvana qarşı həyata keçirilən dron hücumlarının Azərbaycanın suverenliyinə və ərazi bütövlüyünə qarşı ciddi təhdid olduğunu bildirib. O, bu cür addımların regionda gərginliyi artırdığını və beynəlxalq hüquq normalarına zidd olduğunu diqqətə çatdırıb.

Görüş zamanı tərəflər regional təhlükəsizlik, diplomatik səylərin gücləndirilməsi və Türk Dövlətləri Təşkilatı çərçivəsində əməkdaşlığın genişləndirilməsi istiqamətində fikir mübadiləsi aparıblar.