Özbəkistan Respublikasının Prezidenti Şavkat Mirziyoyev Türkiyə Respublikasına rəsmi səfəri çərçivəsində Ankarada Türkiyə Prezidenti Rəcəb Tayyib Ərdoğanla təkbətək görüş keçirib.

Realmedia xəbər verir ki, görüş zamanı iki ölkə arasında mövcud olan hərtərəfli strateji tərəfdaşlıq münasibətlərinin möhkəmləndirilməsi, siyasi dialoqun dərinləşdirilməsi və ikitərəfli əməkdaşlığın yeni istiqamətləri müzakirə olunub.

Tərəflər ticarət-iqtisadi əlaqələrin genişləndirilməsi, qarşılıqlı investisiyaların artırılması, nəqliyyat-logistika, enerji, sənaye, kənd təsərrüfatı, təhsil və mədəniyyət sahələrində əməkdaşlıq perspektivləri ətrafında fikir mübadiləsi aparıblar.

Görüşdə, həmçinin regional və beynəlxalq gündəmdə duran aktual məsələlər, o cümlədən türk dövlətləri arasında əməkdaşlığın gücləndirilməsi və beynəlxalq platformalarda qarşılıqlı dəstək məsələləri diqqət mərkəzində olub.

Qeyd edək ki, səfər çərçivəsində Türkiyə–Özbəkistan Yüksək Səviyyəli Strateji Əməkdaşlıq Şurasının növbəti iclasının keçirilməsi və bir sıra ikitərəfli sənədlərin imzalanması da nəzərdə tutulur.