Macarıstan Respublikasının Azərbaycandakı səfirliyi İranın Azərbaycan Respublikasının Naxçıvan Muxtar Respublikasına qarşı pilotsuz uçuş aparatları ilə həyata keçirilən hücumları kəskin şəkildə pisləyib.

Diplomatik missiyanın açıqlamasında bildirilir ki, bu cür qəbulolunmaz hərəkətlər Azərbaycanın təhlükəsizliyi və suverenliyinin, eləcə də beynəlxalq hüquq normalarının pozulması hesab edilir və bu vəziyyət regional sabitliyə xələl gətirir. Macarıstan səfirliyi Azərbaycan hökuməti və xalqı ilə həmrəylik ifadə edib və xəsarət alanların tezliklə sağalmasını arzulayıb.

Qeyd edək ki, 5 mart 2026-cı il tarixində İran ərazisindən Naxçıvan Muxtar Respublikasına dron hücumları edilib. Hücum nəticəsində Naxçıvan Beynəlxalq Hava Limanının terminal binasına və Şəkərabad kəndində məktəb binasının yaxınlığına zərbələr endirilib, dörd mülki şəxs xəsarət alıb.

Hadisə sonrası İran İslam Respublikasının Azərbaycandakı səfiri Müctəba Dəmirçilu Azərbaycan Xarici İşlər Nazirliyinə çağırılaraq etiraz notası təqdim edilib və Azərbaycan tərəfi özünümüdafiə hüququnu saxladığını bəyan edib.

Macarıstan səfirliyinin bu bəyanatı regionda artan gərginlik şəraitində beynəlxalq narahatlığın əksidir.