Ukraynanın Xarkov vilayətində Rusiya Silahlı Qüvvələri tərəfindən sərnişin qatarına dron hücumu həyata keçirilib. Hadisə nəticəsində ölən və yaralananların olduğu bildirilir.

Ukrayna Baş Prokurorluğunun və yerli rəsmilərin məlumatına görə, hücum Barvinkove istiqamətində hərəkətdə olan sərnişin qatarına edilib. İlkin məlumata əsasən, qatarın yaxınlığına və bir vaqonuna bir neçə kamikadze dron zərbə endirib. Zərbə nəticəsində vaqonlardan birində yanğın baş verib.

Rəsmi açıqlamalarda azı 3 nəfərin həlak olduğu, bir neçə nəfərin isə müxtəlif dərəcəli xəsarətlər aldığı qeyd olunur. Ukrayna Prezidenti Volodimir Zelenski isə hücum nəticəsində ölənlərin sayının 4 nəfər olduğunu, yaralı və itkin düşənlərin də olduğunu bildirib.
Hadisə yerinə xilasedicilər və təcili tibbi yardım briqadaları cəlb olunub, sərnişinlər təxliyə edilib. Yaralılar xəstəxanalara yerləşdirilib, onların vəziyyətinin stabil olduğu bildirilir.

Ukrayna rəsmiləri hücumu mülki əhaliyə qarşı növbəti hərbi cinayət kimi qiymətləndirərək beynəlxalq ictimaiyyəti Rusiyaya qarşı təzyiqləri artırmağa çağırıblar. Faktla bağlı istintaq araşdırmaları davam etdirilir.