Rusiya Silahlı Qüvvələri Ukraynanın Dnipropetrovsk vilayətində yerləşən Krivoy Roq şəhərinə raket zərbələri endirib.

Realmedia xəbər verir ki, yerli rəsmilərin məlumatına görə, hücum zamanı “İskəndər” tipli ballistik raketlərdən istifadə olunub. Raket zərbələri nəticəsində şəhərdə çoxmənzilli yaşayış binaları hədəfə alınıb, ciddi dağıntılar qeydə alınıb.

Hadisə zamanı mülki şəxslər arasında yaralananların olduğu bildirilir. Yaralılar arasında azyaşlı uşağın da olduğu qeyd olunur. Bundan əlavə, zərbə nəticəsində şəhərin bəzi ərazilərində su və kommunal təchizatında fasilələr yaranıb.

Ukrayna tərəfi hücumun mülki infrastruktura qarşı həyata keçirildiyini bildirərək bunu növbəti hərbi cinayət kimi qiymətləndirib. Hazırda hadisə yerində xilasetmə və bərpa işləri davam etdirilir.