Azərbaycan Dövlət Neft Akademiyasında (hazırkı Azərbaycan Dövlət Neft və Sənaye Universiteti) baş vermiş dəhşətli terror aktından 17 il ötür.

Realmedia.info xatırladır ki, 2009-cu il aprelin 30-da baş verən hadisə ölkənin ən ağır faciələrindən biri kimi tarixə düşüb.

Həmin gün Gürcüstan vətəndaşı Fərda Qədirov silahlı şəkildə universitetin Bakı şəhəri, Dilarə Əliyeva küçəsində yerləşən ikinci tədris binasına daxil olaraq tələbə və əməkdaşlara atəş açıb. Nəticədə 12 nəfər həyatını itirib, 13 nəfər isə yaralanıb. Hücumdan sonra o, intihar edib.

Hadisə ölkədə böyük sarsıntıya səbəb olub və hüquq-mühafizə orqanları tərəfindən geniş istintaq aparılıb. İstintaq nəticələrinə görə, terror aktının arxasında xarici əlaqələrin olduğu da qeyd edilib.

Faktla bağlı bir sıra şəxslər məhkəmə məsuliyyətinə cəlb olunub, onlardan bəziləri ömürlük azadlıqdan məhrum edilib.

Faciə zamanı həyatını itirən şəxslər arasında müxtəlif yaş qruplarından olan tələbə və əməkdaşlar olub:

Taleh Məmmədov, Ayna Qurbanova, Tamilla Əzizova, Yusif Bəndəliyev, Ramiz Abdullayev, Məcnun Vahidov, Ceyhun Aslanov, Emin Abdullayev, Ruslan Babaşov, Ayaz Bağırov, Şəfa Məmmədova və Savalan Cabbarov.

Bu ağır faciənin qurbanları hər il ehtiramla anılır.

Allah rəhmət eləsin.