Realmedia.info xəbər verir ki, Elçin Əmirbəyov Kambocaya işgüzar səfəri çərçivəsində bir sıra yüksək səviyyəli görüşlər keçirib.

Səfər zamanı o, dövlət başçısı səlahiyyətlərini icra edən və Senatın sədri Hun Sen, Baş nazir Hun Manet, xarici işlər və beynəlxalq əməkdaşlıq naziri Prak Sokhonn, Milli Assambleyanın sədri Xon Sodari və digər rəsmi şəxslərlə görüşüb.

Hun Senlə keçirilən görüşdə kambocalı siyasətçi 2014-cü ildə baş nazir kimi Azərbaycana səfərini xatırladığını bildirib və salamlarını Prezident İlham Əliyevə çatdırmağı xahiş edib. O, Azərbaycanı yaxın dost və etibarlı tərəfdaş kimi qiymətləndirib.

Elçin Əmirbəyov Baş nazir Hun Manetlə görüş zamanı Prezident İlham Əliyevin dəvət məktubunu təqdim edib. Məktubda oktyabr ayında Bakıda keçiriləcək AQEM-in 7-ci Zirvə Görüşünə dəvət yer alıb. Hun Manet tədbirdə iştirak etmək niyyətində olduğunu bildirib.
Danışıqlar zamanı Azərbaycan-Kamboca münasibətlərinin inkişaf perspektivləri, siyasi dialoq, parlamentlərarası əlaqələr və beynəlxalq təşkilatlar çərçivəsində əməkdaşlıq məsələləri müzakirə olunub.

Tərəflər enerji, nəqliyyat, kənd təsərrüfatı, turizm, təhsil, ətraf mühit və investisiya sahələrində əməkdaşlığın genişləndirilməsi imkanlarını da nəzərdən keçiriblər. Kamboca tərəfi Azərbaycanın enerji təhlükəsizliyi və beynəlxalq logistika sahəsində mühüm rol oynadığını vurğulayıb.

Səfər çərçivəsində Elçin Əmirbəyov Azərbaycan-Ermənistan normallaşma prosesi, Vaşinqton razılaşmaları və regionda davamlı sülhün təmin olunması istiqamətində görülən işlər barədə də qarşı tərəfə ətraflı məlumat verib.

Kamboca rəsmiləri Azərbaycanın sülh gündəliyini dəstəklədiklərini bildirərək, yaxın vaxtlarda sülh sazişinin imzalanacağına ümid etdiklərini qeyd ediblər.

Prezidentin xüsusi nümayəndəsi işğaldan azad edilmiş ərazilərdə aparılan yenidənqurma işləri və mina təhlükəsinə qarşı həyata keçirilən tədbirlər barədə də məlumat verib. O, payızda Bakıda keçiriləcək 4-cü Beynəlxalq Humanitar Minatəmizləmə Konfransı barədə danışaraq, Kambocanın tədbirdə fəal iştirak edəcəyinə ümid etdiyini bildirib.

Səfər çərçivəsində Elçin Əmirbəyov həmçinin Kambocanın Milli Diplomatiya və Beynəlxalq Münasibətlər İnstitutunda çıxış edib və ölkənin dövlət televiziya kanalı TVKna müsahibə verib.