Rusiya prezidentinin davamlı inkişaf məqsədlərinə nail olmaq üçün beynəlxalq təşkilatlarla əlaqələr üzrə xüsusi nümayəndəsi Boris Titov Rusiyanın Ermənistanın kənd təsərrüfatı məhsullarını Azərbaycandan gələn tədarüklərlə əvəzləmək niyyətində olduğunu açıqlayıb.

Realmedia.info xəbər verir ki, Boris Titov bu barədə Sankt-Peterburq Beynəlxalq İqtisadi Forumu çərçivəsində çıxışı zamanı danışıb.

O bildirib ki, Azərbaycanın kənd təsərrüfatı sahəsində imkanları daha genişdir və ölkə daha böyük həcmdə məhsul tədarük etmək gücünə malikdir.

“Ermənistanla itirdiyimizi Azərbaycanla əvəzləyəcəyik, çünki kənd təsərrüfatı sahəsində Azərbaycanın Ermənistandan daha çox şeyə qadir olduğu və daha çox məhsul verdiyi tamamilə aydındır”, – deyə Titov vurğulayıb.

Rusiya rəsmisinin sözlərinə görə, Azərbaycanın aqrar sektoru yüksək potensiala malikdir və bu amil onu Rusiya üçün daha cəlbedici tərəfdaşa çevirir.

Boris Titov həmçinin Ermənistanın Avropa İttifaqına mümkün inteqrasiyasının iqtisadi nəticələrinə də toxunub. O qeyd edib ki, belə bir addım ölkədə iqtisadi qeyri-sabitliyə, qiymət artımına və müxtəlif sahələrdə ciddi çətinliklərə səbəb ola bilər.

Titovun fikrincə, bu proses Ermənistanın sosial-iqtisadi həyatının demək olar ki, bütün sahələrinə mənfi təsir göstərəcək.