Azərbaycan Prezidenti İlham Əliyev Ramazan bayramı münasibətilə Azərbaycan xalqını təbrik edib. [xfgiven_qirmizi] [xfvalue_qirmizi] [/xfgiven_qirmizi]
Dövlət başçısı təbrikində bildirib ki, Ramazan ayı hər il xalqımızın birlik və bərabərliyini daha da möhkəmləndirir, xeyirxahlığın və savab əməllərin təntənəsinə çevrilir. Prezident vurğulayıb ki, bu mübarək günlərdə edilən dualar dövlətimizin əmin-amanlığına, firavanlığına və tərəqqisinə xidmət edir.
İlham Əliyev həmçinin Azərbaycanın müstəqilliyi və ərazi bütövlüyü uğrunda canından keçmiş şəhidlərin xatirəsini ehtiramla yad etdiyini qeyd edib.
Dövlət başçısı bir daha Azərbaycan xalqına və dünyanın müxtəlif guşələrində yaşayan soydaşlarımıza səmimi təbriklərini çatdıraraq, ailələrə səadət, süfrələrə bol ruzi və bərəkət arzulayıb.
Sonda Prezident bildirib: “Allah orucunuzu və dualarınızı qəbul etsin. Ramazan bayramınız mübarək olsun!”
