Azərbaycan Prezidenti İlham Əliyev Çinin Sədri Si Cinpinə Bahar bayramı münasibətilə təbrik məktubu göndərib.
"Report"un məlumatına görə, məktubda Prezident İlham Əliyev Sədri və Çin xalqını bayram münasibətilə ürəkdən təbrik edib:

“Sülh və harmoniyanın rəmzi, yeniliyin, ümidin, təbiətə minnətdarlıq hissinin təcəssümü olan bu qədim bayram bütün qayəsi ilə qarşılıqlı anlaşmanı, dostluğu və birliyi tərənnüm edir. Çin təqvimi ilə yeni ilin gəlişini qeyd edən Çuntsze bayramının xalqınıza xoş ovqat, firavanlıq və bol ruzi-bərəkət gətirməsini diləyirəm”, – deyə məktubda vurğulanıb.

Prezident İlham Əliyev məktubunda Azərbaycan-Çin münasibətlərinin dərinləşməsinə və strateji tərəfdaşlığın güclənməsinə diqqət çəkib. O, siyasi dialoqun intensivliyinin və qarşılıqlı anlaşmanın bu münasibətlərin daha sürətli inkişafına şərait yaratdığını bildirib.

Məktubda həmçinin vurğulanıb ki, Azərbaycan-Çin ənənəvi dostluq münasibətləri və səmərəli əməkdaşlıq xalqlarımızın mənafelərinə uyğun olaraq bundan sonra da genişlənəcək və strateji tərəfdaşlıq daha da güclənəcəkdir.

Prezident İlham Əliyev bir daha Çin Sədri və xalqına səmimi təbriklərini çatdırıb, möhkəm cansağlığı, xoşbəxtlik və rifah arzulayıb.