Azərbaycanın şimal bölgələrində zəlzələ qeydə alınıb.

Realmedia.info xəbər verir ki, Azərbaycan Milli Elmlər Akademiyası nəzdində Respublika Seysmoloji Xidmət Mərkəzinin Zəlzələlərin tədqiqatı bürosunun məlumatına əsasən, avqustun 14-də yerli vaxtla saat 20:56-da Quba rayonu ərazisində 4,9 maqnitudalı zəlzələ baş verib.



Bildirilib ki, zəlzələnin ocağı 13 kilometr dərinlikdə yerləşib.

Yeraltı təkanlar Quba ilə yanaşı, Azərbaycanın bir sıra şimal rayonlarında da hiss olunub. Zəlzələnin Quba rayonunda episentrdə təxminən 5 bala yaxın, ətraf rayonlarda isə 3-4 bala qədər hiss edildiyi bildirilib.

Fövqəladə Hallar Nazirliyinin məlumatına görə, zəlzələ nəticəsində hər hansı dağıntı və ya insan xəsarəti barədə bu vaxtadək quruma məlumat daxil olmayıb.

Sosial şəbəkələrdə yayılan məlumatlarda təkanların Quba, Siyəzən, Qusar, Xaçmaz, Şabran, İsmayıllı və Qəbələ rayonlarında hiss edildiyi qeyd olunub.

Hazırda zəlzələnin mümkün fəsadları ilə bağlı aidiyyəti qurumlar tərəfindən vəziyyətin monitorinqi davam etdirilir.

Realmedia.info