Azərbaycan Prezidenti İlham Əliyevin Azərbaycan Televiziyasına müsahibəsində səsləndirdiyi mühüm fikirlər Türkiyə mediasında geniş işıqlandırılıb.

Realmedia.info xəbər verir ki, qardaş ölkənin aparıcı xəbər agentlikləri, televiziya kanalları, xəbər portalları və qəzetləri Azərbaycan Prezidentinin açıqlamalarını geniş auditoriyalarına təqdim edib və müsahibədən sitatlar yayımlayıblar.

“Türkiye” qəzeti “Zəngəzur dəhlizi genişlənir! Əliyev məsələni ətraflı izah etdi” sərlövhəli məqaləsində Azərbaycanın əsas hissəsini Naxçıvanla birləşdirəcək marşrutun Türkiyə və Türk dünyası üçün əhəmiyyətini vurğulayıb.

Məqalədə Prezident İlham Əliyevin TRIPP – Beynəlxalq Sülh və Rifah naminə Tramp Marşrutu ilə bağlı fikirlərinə də yer verilib. Qeyd olunub ki, sözügedən marşrut yalnız dəmir yolu və avtomobil yolundan ibarət olmayacaq. Gələcəkdə burada fiber-optik kabellərin, elektrik xətlərinin, zərurət yaranacağı təqdirdə isə neft və qaz boru kəmərlərinin çəkilməsi imkanları da nəzərdən keçirilə bilər.

“Hürriyet”, “Milliyet”, “Star” və digər nüfuzlu türk nəşrləri də Azərbaycan Prezidentinin müsahibəsində səsləndirdiyi fikirləri oxucularına çatdırıb.

“Anadolu” agentliyi isə “Azərbaycan Prezidenti Zəngəzur dəhlizini qiymətləndirir” başlıqlı materialında 2025-ci il avqustun 8-də Vaşinqtonda keçirilən tarixi sammitin nəticələrinə diqqət çəkib.

Agentlik Prezident İlham Əliyevin Ermənistan sərhədinə dəmir yolu xəttinin çəkilməsi, eləcə də Naxçıvanda dəmir yolu infrastrukturunun inkişafı ilə bağlı fikirlərini yayıb. Bildirilib ki, Azərbaycan gələcəkdə bu nəqliyyat dəhlizi vasitəsilə yükdaşımalarının həcmini ildə ən azı 15 milyon tona çatdırmağı hədəfləyir.

“Anadolu” Azərbaycan Prezidentinin Ermənistanın köhnəlmiş atom elektrik stansiyasının region üçün yaratdığı təhlükə ilə bağlı fikirlərinə də xüsusi diqqət yetirib.

Türkiyənin “HaberGlobal”, “HaberTürk” və “Ulusal TV” televiziya kanalları da Prezident İlham Əliyevin açıqlamaları ilə bağlı reportajlar hazırlayıb. Müvafiq materiallar həmin media qurumlarının internet saytlarında və sosial media platformalarında da yayımlanıb.

Beləliklə, Azərbaycan Prezidentinin regional nəqliyyat, enerji təhlükəsizliyi və Zəngəzur dəhlizi ilə bağlı mesajları Türkiyə mediasında geniş rezonans doğuraraq qardaş ölkənin ictimaiyyətinə çatdırılıb.