Kolumbiyanın qərbində baş verən güclü zəlzələ nəticəsində ölənlərin sayı 111 nəfərə çatıb.

Realmedia.info xəbər verir ki, bu barədə ölkə Prezidenti Abelardo de la Esprielya məlumat verib.

Bakı vaxtı ilə saat 21:30-a olan məlumata görə, təbii fəlakət nəticəsində 111 nəfər həyatını itirib, 87 nəfər yaralanıb.

Zəlzələ nəticəsində 1 575 yaşayış binasına ziyan dəyib. Onlardan 37-si tamamilə dağılıb, 61 bina isə uçub.

Ölənlərin sayı əvvəlcə 70-i keçmişdi

Daha əvvəl Kolumbiyanın qərbində baş verən zəlzələ nəticəsində 70-dən çox insanın öldüyü bildirilmişdi.

Risaralda departamentinin qubernatoru Xuan Dieqo Patinyonun sözlərinə görə, yalnız bu regionda 42 nəfər həyatını itirib. O, paytaxt zonasına daxil olan üç bələdiyyədə 40, qərb bələdiyyələrində isə daha iki nəfərin öldüyünü açıqlamışdı.

Ölənlərin sayı 24 nəfər olaraq açıqlanmışdı

İlkin məlumatlarda zəlzələ nəticəsində azı 24 nəfərin öldüyü, 100 nəfərin isə itkin düşdüyü bildirilmişdi.

Vaye-del-Kauka departamentinin qubernatoru Dilyan Fransiska Kalima-El-Darien şəhərində divarın uçması nəticəsində üç uşağın öldüyünü, Sarsal şəhərində isə bir nəfərin həyatını itirdiyini açıqlamışdı.

Həmin vaxt Pereyra şəhərinin meri Maurisio Salasar 18, Manisales şəhərinin meri Xorxe Roxas isə iki nəfərin öldüyünü bildirmişdi. Yerli hakimiyyət orqanlarının məlumatına əsasən, Manisalesdə azı 100 nəfər itkin hesab olunurdu.

Zəlzələnin maqnitudası 7,4 olub

Avropa-Aralıq Dənizi Seysmoloji Mərkəzinin məlumatına görə, Kolumbiyada 7,4 maqnitudalı zəlzələ qeydə alınıb.

Zəlzələnin episentri təxminən 134 min nəfər əhalisi olan Kartaqo şəhərindən 31 kilometr şimal-qərbdə yerləşib. Yeraltı təkanların ocağı 115 kilometr dərinlikdə olub.

Çoko departamentinin qubernatoru Nubiya Karolina Kordoba-Kuri Kibdo şəhərində xəsarət alanların olduğunu və binalara ciddi ziyan dəydiyini bildirib.

Hazırda ərazidə dəymiş zərərin miqyası qiymətləndirilir. Qubernator yeraltı təkanların yenidən baş verməsi ehtimalının olduğunu da qeyd edib.