İranın Ali lideri və Silahlı Qüvvələrin Ali Baş Komandanı Müctəba Xamenei ölkənin ali hərbi komandanlığında bir sıra mühüm vəzifələrə yeni rəhbərlərin təyin edilməsi ilə bağlı fərmanlar imzalayıb.

Realmedia.info xəbər verir ki, bu barədə “Tasnim” agentliyi məlumat yayıb.

Məlumata görə, İslam İnqilabı Keşikçiləri Korpusunun (SEPAH) general-mayoru Əli Abdullahi Silahlı Qüvvələrin Baş Qərargahının rəisi təyin edilib. Briqada generalı Kiyumərs Heydəri isə onun müavini vəzifəsinə gətirilib.

SEPAH-ın baş komandanı vəzifəsi general-mayor rütbəsi verilmiş Əhməd Vahidiyə həvalə olunub. SEPAH-ın general-mayoru Mustafa Ezadi isə onun müavini təyin edilib.

İran Hərbi Dəniz Qüvvələrinin komandanlığı kontr-admiral Əli Əzəmiyə tapşırılıb.

Bundan əlavə, hərbiləşdirilmiş “Bəsic” qüvvələrinin rəhbəri vəzifəsinə Hüseyn Təeb təyin olunub.

Yeni təyinatların İranın ali hərbi rəhbərliyində mühüm dəyişikliklərdən biri olduğu bildirilir.