Samux rayonunda Kür çayında boğularaq həyatını itirən 17 yaşlı Gülnaz Məmmədova ilə bağlı bəzi təfərrüatlar məlum olub.

Realmedia.info xəbər verir ki, 2009-cu il təvəllüdlü Gülnaz Elçin qızı Məmmədova ailəsi ilə birlikdə Samux rayonunun Yenikənd kəndi ərazisində Kür çayına istirahətə gedib.

Hadisə ailə üzvlərinin çayda çimdiyi zaman baş verib. Məlumata görə, Gülnaz qardaşının suda boğulduğunu düşünərək onun köməyinə getmək istəyib. Lakin bir müddət sonra özü suda itib.

Gülnazın nənəsinin sözlərinə görə, ailə üzvləri onun suda itdiyini gördükdən sonra dərhal axtarışa başlayıblar:

«“Gözümüz baxa-baxa nəvəm suda birdən yoxa çıxdı. Oğlum, digər nəvəm dalınca getdilər, tapa bilmədilər. Keçən dəfə də gəlmişdik. Həmişə üzürdü. Gülnaz elə bilib ki, qardaşı boğulur, onun dalınca suya girmişdi”.»

Mərhumun nənəsi bildirib ki, Gülnaz idmanla məşğul olub və bir sıra yarışlarda uğur qazanıb. O, bu il 11-ci sinfi başa vurub.

Qeyd edək ki, Samux rayonunu təmsil edən Gülnaz Məmmədova kikboksinq üzrə Azərbaycan çempionu olub. O, sonuncu dəfə Gəncədə keçirilən kikboksinq üzrə XXX Azərbaycan birinciliyində qızıl medal qazanıb.

Fövqəladə Hallar Nazirliyinin Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri tərəfindən aparılan axtarışlar nəticəsində Gülnaz Məmmədovanın meyiti sudan çıxarılıb və aidiyyəti üzrə təhvil verilib.

Hadisə ilə bağlı araşdırma aparılır.

Realmedia.info