Türkiyənin İstanbul şəhərinin Kağıthane rayonunda Azərbaycan vətəndaşı olan 57 yaşlı Lətifə İbadovanın meyiti yaşadığı mənzildə aşkarlanıb.

Hadisə avqustun 9-da günorta saatlarında baş verib.

Türkiyə mediasının yaydığı məlumata görə, qadının meyitinə ilkin baxış zamanı onun bədənində hər hansı zorakılıq, zərbə və ya kəsici alət xəsarəti müəyyən edilməyib.

Lətifə İbadovanın ölüm səbəbi məhkəmə-tibbi ekspertizasının nəticəsindən sonra dəqiqləşəcək.

Hadisə ilə bağlı hüquq-mühafizə orqanları qadınla eyni mənzildə yaşayan Fərhad adlı şəxsin axtarışına başlayıb. Məlumata görə, həmin şəxs polisə məlumat daxil olmamışdan təxminən 15 dəqiqə əvvəl mənzili tərk edib.

Hadisə yerində narkotik vasitə olduğu ehtimal edilən maddə də aşkarlanıb. Maddə ekspertizaya göndərilib.

Hazırda prokurorluq 57 yaşlı azərbaycanlı qadının ölümü ilə bağlı araşdırma aparır. Araşdırmanın nəticəsindən asılı olaraq hadisənin dəqiq səbəbləri və digər təfərrüatlar müəyyənləşdiriləcək.



Realmedia.info