Bakının Xətai rayonunda avtomobil salonunda yanğın baş verib.

Realmedia.info xəbər verir ki, hadisə Babək prospektində yerləşən obyektdə qeydə alınıb.

Məlumat daxil olduqdan dərhal sonra Fövqəladə Hallar Nazirliyinin Dövlət Yanğından Mühafizə Xidmətinin qüvvələri hadisə yerinə cəlb olunub.

Əməliyyat şəraiti qiymətləndirilərkən yanğının ümumi sahəsi 1200 kvadratmetr olan üçmərtəbəli avtomobil salonunda baş verdiyi və alovun yayılma riskinin yüksək olduğu müəyyən edilib.

Yanğınsöndürənlərin çevik müdaxiləsi nəticəsində alov qısa müddətdə söndürülüb. Yanğının obyektin digər hissələrinə, o cümlədən salonda park edilmiş avtomobillərə keçməsinin qarşısı alınıb.

Hadisə nəticəsində ümumi sahəsi 15 kvadratmetr olan ofis otağının yanar konstruksiyaları yanıb. Salonda yerləşən BMW markalı minik avtomobilinin arxa bamperi və işığı isə deformasiya olub.

Obyektin böyük hissəsi və içərisində park edilmiş avtomobillər yanğından mühafizə edilib.