Azərbaycan Respublikasının Prezidenti İlham Əliyev və birinci xanım Mehriban Əliyeva avqustun 11-də Naxçıvan Sənaye Parkının təməlqoyma mərasimində iştirak ediblər.

Realmedia.info xəbər verir ki, iqtisadiyyat naziri Mikayıl Cabbarov dövlət başçısına və birinci xanıma Naxçıvan Sənaye Parkı barədə məlumat verib.



Bildirilib ki, sənaye parkı Azərbaycan Prezidentinin 2024-cü ildə imzaladığı Fərmanla yaradılıb. Parkın fəaliyyətinin təşkili məqsədilə ilkin mərhələdə ərazinin istifadəyə yararlı vəziyyətə gətirilməsi, növbəti mərhələdə isə xarici və daxili infrastrukturun yaradılması nəzərdə tutulur.

Buraya elektrik və istilik enerjisi, qaz, su, rabitə, nəqliyyat, istehsal, inzibati, sosial və digər obyektlərin yaradılması daxildir.

Naxçıvan şəhərinin cənub-qərb hissəsində, Naxçıvan-Sədərək avtomobil yolunun cənubunda yerləşəcək sənaye parkı 310 hektar ərazini əhatə edəcək.

Hazırda sənaye parkına potensial sahibkarların cəlb olunması istiqamətində bir sıra layihələr üzrə danışıqlar aparılır.

Qeyd edilib ki, Azərbaycanda hazırda 8 sənaye parkı fəaliyyət göstərir. Bunlar Sumqayıt, Mingəçevir, Qaradağ, Pirallahı, Ağdam, Hacıqabul, “Araz Vadisi İqtisadi Zonası” və Balaxanı sənaye parklarıdır.

Bundan başqa, Gəncə şəhərinin və Şəmkir rayonunun inzibati ərazilərində yaradılacaq Qərb Sənaye Parkında infrastrukturun qurulması üçün texniki şərtlərin alınması prosesi aparılır.

Hazırda ölkənin sənaye parklarında ümumilikdə 184 rezident qeydiyyata alınıb. Onlardan 101-i artıq fəaliyyət göstərir. İndiyədək rezidentlər tərəfindən 7,1 milyard manatdan çox investisiya cəlb edilib və 11 500-dən çox iş yeri yaradılıb.

Məlumata görə, 2026-cı il iyulun 1-nə qədər sənaye parklarında ümumilikdə 21,4 milyard manatlıq məhsul istehsal olunub. Bunun 6,7 milyard manatlıq hissəsi ixrac edilib.