Ali təhsil müəssisələrinə qəbul olmaq istəyən abituriyentlər üçün ixtisas seçimi başlayıb.

Realmedia.info xəbər verir ki, Dövlət İmtahan Mərkəzinin (DİM) məlumatına əsasən, ixtisas seçimi avqustun 12-dən 19-dək aparılacaq.

Abituriyentlər ixtisas seçimi ilə bağlı Azərbaycan Universiteti, Qərbi Kaspi Universiteti, Bakı Biznes Universiteti, Odlar Yurdu Universiteti, Azərbaycan Memarlıq və İnşaat Universiteti, Azərbaycan Texniki Universiteti, Azərbaycan Milli Konservatoriyası, Azərbaycan Dövlət Neft və Sənaye Universiteti, Azərbaycan Dövlət Aqrar Universiteti və Sumqayıt Dövlət Universitetində, həmçinin DİM-in regional bölmələrində fəaliyyət göstərən “Abituriyent Məsləhət Mərkəzləri”nə müraciət edə bilərlər.

Mərkəzlərdə abituriyentlərə ixtisas seçimi ilə bağlı ödənişsiz məsləhət və köməklik göstərilir.

Bundan əlavə, müəyyən edilmiş tarixlərdə rayon təhsil sektorlarında və bəzi məktəblərdə DİM əməkdaşları tərəfindən abituriyentlərə tələbə qəbulu qaydaları, “Abituriyentin elektron ixtisas seçimi ərizəsi”nin doldurulması və təsdiqlənməsi, müsabiqə şərtləri, ixtisas seçimi zamanı diqqət edilməli məqamlar və digər məsələlərlə bağlı ödənişsiz yardım göstəriləcək.

Abituriyentlərə ixtisas seçimi zamanı müsabiqə şərtlərini və qəbul qaydalarını diqqətlə nəzərdən keçirmələri tövsiyə olunur.