"Neftçi" klub tarixinin ən bahalı satışını etməyə hazırlaşır.

Realmedia.info xəbər verir ki, komandanın aparıcı üzvlərindən olan İmad Faraj "ağ-qaralar"ı tərk edir.

Fransalı futbolçu bir müddətdir Tunisin "Esperans" klubunun maraq dairəsindədir. Tərəflər arasında uzun müddətdir davam edən danışıqlar müsbət nəticələnib və Tunis klubu "Neftçi"ni razı salmağı bacarıb.

Məlumata görə, "Esperans" bu transfer üçün Azərbaycan klubuna yüksək məbləğdə təzminat ödəyəcək. Paytaxt təmsilçisi İmad Farajın satışından 1,5 milyon avrodan çox gəlir əldə edəcək.

Bu məbləğ "Neftçi" tarixində futbolçunun satışından əldə olunan ən yüksək transfer gəliri olacaq.

Qeyd olunur ki, Tunis klubu ilə yanaşı, daha bir neçə komanda da futbolçunun xidmətində maraqlı olub. Lakin "Esperans"ın təklif etdiyi təzminat məbləği digər klubların təkliflərini üstələyib və "Neftçi" transferin reallaşmasına mane olmayıb.

Xatırladaq ki, fransalı sağ cinah hücumçusu İmad Faraj 2025-ci ildə "Neftçi" ilə 3 illik müqavilə imzalayıb.