“Araz-Naxçıvan”ın yarımmüdafiəçisi Çarles Boli karyerasını növbəti mövsümdə də Azərbaycanda davam etdirə bilər.

Realmedia.info xəbər verir ki, Şotlandiyada doğulan, Fransa və Kot-d’İvuar vətəndaşlığına malik olan futbolçu hazırda “Neftçi”nin transfer siyahısında yer alıb.

Məlumata görə, “ağ-qaralar” Muxtar Respublika təmsilçisi ilə müqavilə müddəti başa çatmaq üzrə olan legionerlə danışıqlar aparır.

Bildirilir ki, “Neftçi”nin baş məşqçisi Yuri Vernidub sağ cinah vingeri mövqeyində çıxış edən futbolçunu komandasında görmək istədiyini klub rəhbərliyinə çatdırıb.

27 yaşlı Çarles Boli karyerası ərzində Fransanın “Lans”, “Po”, “Paris”, eləcə də İtaliyanın “Viçentsa” klublarında forma geyinib.

Qeyd edək ki, futbolçu ötən mövsümü Kiprin “Apollon” (Limasol) klubunda keçirib və həmin dövrdə də “Neftçi”nin maraq dairəsində olub. Tərəflər arasında danışıqlar aparılsa da, futbolçu sonda “Araz-Naxçıvan”ı seçib.

Buna səbəb kimi Naxçıvan klubunun Konfrans Liqasında iştirakı və daha sərfəli maliyyə şərtləri göstərilir.