Ukraynalı mütəxəssis Roman Qriqorçuk “Neftçi”dəki fəaliyyəti ilə bağlı fikirlərini bölüşüb və komandanın yeni baş məşqçisi, həmyerlisi Yuri Vernidubun təyinatını dəyərləndirib.

Realmedia xəbər verir ki, o, bu barədə ölkəsinin sport.ua saytıma danışıb.


Qriqorçuk bildirib ki, “Neftçi”dəki işi ilə bağlı dəfələrlə danışıb: “Hər şey normal idi, sadəcə nəticə alınmırdı. “Neftçi” böyük brenddir, amma uzun müddətdir yüksək nəticələr əldə edə bilmir. Bu klubda səbrlə gözləmək adəti yoxdur. Komanda turnir cədvəlinin yuxarı pillələrində olmayanda və avrokuboklara vəsiqə qazanmayanda bu, həmin böyük klub üçün normal hal sayılmır. Nəticə olmayanda isə dərhal başqa məşqçi axtarılır ki, tezliklə uğur gəlsin”.

O, klub rəhbərliyi ilə münasibətlərinə də toxunub: “Rəhbərlik barədə bir dənə də pis söz deyə bilmərəm. Münasibətlərimiz çox isti olub və indi də elədir”.

Qriqorçuk Yuri Verniduba uğurlar arzulayıb: “Qarabağ”ı taxtdan salmaq çox çətin olacaq, amma düşünürəm ki, “Neftçi”nin məqsədi çempionluqdur. Mən bu komandaya gələndə də yalnız bir məqsədim var idi – ən yüksək yer və Çempionlar Liqası. Arzu edirəm ki, Yuri Nikolayeviç buna nail ola bilsin”.