“Sabah”ın baş məşqçisi: “Qarabağ”ın səviyyəsinə çatmaq üçün çox inkişaf etməliyik”
Realmedia xəbər verir ki, “Sabah” futbol klubunun baş məşqçisi Valdas Dambrauskas Misli Premyer Liqasının XVI turunda “Sumqayıt” üzərində qazanılan qələbədən (3:1) sonra mətbuat konfransında açıqlama verib.
Mütəxəssis oyunu şərh edərək qələbənin vacibliyini vurğulayıb:

“Bütün ‘Sabah’ ailəsini qələbə münasibətilə təbrik edirəm. Bu, bizim üçün çox önəmli idi. Düzdür, daha yaxşı oynaya bilərdik. Matçın sonlarında bir qədər çətinlik yaşadıq. Futbolçular son aylarda ciddi inkişaf ediblər. Qış fasiləsində mövsümün ikinci yarısına daha güclü hazırlaşacağıq”.

Baş məşqçi turnir cədvəlindəki mövqenin hələ heç nə ifadə etmədiyini də bildirib:

“Mövsümün bitməsinə hələ çox var. Fasiləyə ‘qış çempionu’ kimi yollanmaq medal demək deyil. Böyük uğurlar üçün davamlı və ciddi işləmək lazımdır”.
Valdas Dambrauskas çempionluğun əsas namizədi olan “Qarabağ”la bağlı da fikirlərini bölüşüb:

“Qarabağ çox güclü komandadır və Avropada da öz sözünü deyib. Onların uğurlarına çatmaq üçün biz hələ çox inkişaf etməliyik”.

Qeyd edək ki, “Sumqayıt” – “Sabah” qarşılaşması Bakı təmsilçisinin 3:1 hesablı qələbəsi ilə başa çatıb.