Mayın 10-da Azərbaycan Respublikasının Prezidenti İlham Əliyev Zəngilan şəhərində inşa olunmuş 104 mənzilli ilk yaşayış kompleksinin açılışında iştirak edib.

Realmedia.info xəbər verir ki, Cəbrayıl, Qubadlı və Zəngilan rayonlarında Prezidentin xüsusi nümayəndəsi Vahid Hacıyev dövlət başçısına kompleksdə yaradılan şərait barədə məlumat verib.

Qeyd olunub ki, 2022-ci ildə həmin yaşayış kompleksinin təməlqoyma mərasimində Prezident İlham Əliyev və birinci xanım Mehriban Əliyeva iştirak ediblər. Sonrakı illərdə – 2024 və 2025-ci illərdə də Prezident tikinti işlərinin gedişi ilə yerində tanış olub.

Məlumata görə, ümumi sahəsi 2 hektardan artıq olan kompleksdə 12 bina inşa edilib. Onlardan 4-ü 60 mənzilli üçmərtəbəli, 8-i isə 44 mənzilli ikimərtəbəli “townhouse” tipli evlərdir.

Kompleksdə ümumilikdə 104 mənzil mövcuddur. Mənzillərin 84-ü sakinlər üçün, 20-si isə xidməti istifadə üçün nəzərdə tutulub. Evlər 2, 3, 4 və 5 otaqlıdır.

Ərazidə sakinlərin rahatlığı üçün uşaq və idman meydançaları, velosiped zolaqları, həm yeraltı, həm də yerüstü avtomobil dayanacaqları yaradılıb. Kompleks Zəngilan şəhərinin Baş Planına uyğun olaraq mərkəzi zonada – məktəb, uşaq bağçası və parkın yaxınlığında yerləşir.