Şuşa rayonunun Böyük Qaladərəsi kəndində birinci mərhələdə 17 fərdi ev bərpa edilib.

Realmedia.info xəbər verir ki, bunu Şuşa rayonunda Prezidentin xüsusi nümayəndəliyinin aparıcı məsləhətçisi İsmayıl İsmayılov bildirib.

Onun sözlərinə görə, kənd 1992-ci ildə Ermənistan silahlı qüvvələri tərəfindən işğal olunub, 2023-cü ildə isə Azərbaycan Silahlı Qüvvələrinin həyata keçirdiyi antiterror əməliyyatı nəticəsində azad edilib.

İsmayıl İsmayılov qeyd edib ki, kənddə yaşayış üçün zəruri infrastrukturun yaradılması istiqamətində mühüm işlər görülüb. Belə ki, əraziyə yeni transformator quraşdırılıb, elektrik xətləri çəkilib və mövcud şəbəkə bərpa olunub. Köçürülən ailələrin yaşadığı evlər sayğaclaşdırılıb, kəndə qaz xətti çəkilib və qaz sayğaclarının quraşdırılmasına başlanılıb.

Bununla yanaşı, sakinlərin içməli su ilə təminatı məqsədilə paylayıcı su xətləri çəkilib, sayğaclar quraşdırılıb. Hazırda kənddə rabitə xətlərinin çəkilməsi davam etdirilir. Kənddaxili yollar abadlaşdırılıb, sakinlərin istirahəti üçün park və Bayraq meydanı salınıb.

Nümayəndə bildirib ki, kənddəki 50 fərdi evdən 13-ü tam yararsız, 37-si isə qismən yararlı vəziyyətdədir. Birinci mərhələdə 17 ev bərpa olunub, növbəti mərhələdə isə daha 20 evin bərpası planlaşdırılır.

Qeyd olunub ki, hazırda Böyük Qaladərəsi kəndinə 64 nəfərdən ibarət 14 ailə geri qayıdıb.

Xatırladaq ki, Prezident İlham Əliyev mayın 28-də Şuşa rayonunun Böyük Qaladərəsi kəndində fərdi evlərin və infrastrukturun bərpası istiqamətində görülən işlərlə tanış olub.